Gemeentenuus (Kort artikels oor die aktiwiteite van die gemeente)
Sop en Poeding, 29/7/2022
Die baie gewilde Sop & Poeding kuieraand kon weer Vrydag in die saal plaasvind, die eerste keer na Covid.
Daar is reggemaak vir 130 gaste, en tog moes meer stoele uiteindelik ingedra word om almal te akkomodeer!
Gemeentekuier 28/1/2022
Die jaar se sosiale aktiwiteite het afgeskop met ‘n Burger-aand wat deur Dienende Hande aangebied is om dankie te sê aan die gemeentelede wat deurlopend so gewillig is om hand by te sit met al die gemeente-aktiwiteite.
Die kuier onder die bome het verskuif na ‘n kuier langs die saal om bietjie skuiling te soek teen die lastige Suidooster wat Vrydagaand gewaai het. Dit het egter geen invloed gehad op die heerlike saamkuier van die 80 gemeentelede wat die aand kom geniet het.
Seniorburger bederfpakkies.
CARITAS
(Ons gemeente se diens van barmhartigheid)
Caritas wil van die geleentheid gebruik maak om gemeentelede te bedank vir hul getroue ondersteuning in die vorm van bydraes. Hierdie bydraes het Caritas onder andere in staat gestel om 188 van ons senior burgers wat 80 jaar en ouer is, se harte te verbly in die vorm van ‘n bederf-geskenkpakkie wat gedurende November uitgedeel is. 10 Gesinne en 2 enkellopende persone gaan ook so ‘n kersgeskenkpak ontvang. ‘n Groot dank van waardering aan almal wat gehelp het om hierdie pakkies saam te stel en aan die blokleiers en omgeewerkers vir die aflewering daarvan. Hester Loots: Voorsitter Caritas
Dankie, CARITAS!
Heelwat gemeentelede wat hierdie bederfpakkies ontvang het, het weer hul waardering teenoor Caritas uitgespreek vir hierdie omgeegebaar teenoor ons 80-jarige en ouer gemeentelede.
105 kg kleinkoekies!
28/09/2021
Die fotos toon die span van Dienende Hande, besig om 105 kg koekies te maak!
Hiervan word 210 pakkies opgemaak vir Caritas se gemeentelede bo 80 jaar, om later uitgedeel te word. Daar word ook 100 pakkies opgemaak om saam te stuur Loeriesfontein toe.
Basaarmark 2021 (28 Aug.)
So het ‘n besoeker ons Basaarmark ervaar:
Liefste vriendin,
Ek komplimenteer julle met julle basaar!
- Puik beplan en georganiseer;
- Die kos, elke item wat geëet kon word, laat steeds ons monde water. Jul keuses uit die boonste rakke;
- Nêrens was haakplekke nie. Jul organisasie tot by die kasregister het op geoliede wiele geloop.
- Jul het ons bedien met ‘n vonkel in die oog – en orals – gryskoppe in die meerderheid! Dit wil gedoen wees.
- Julle was paraat, hulpvaardig, hardwerkend, vriendelik, op en wakker. Julle kan en wil en het.
- God se strome van seën het oor julle en julle basaargangers gereën
Ek wil afsluit….ek het te veel sakke gehad om te dra en te hanteer. By myself gedink: “hoe nou gemaak?” En hier kom nog n gryskop, skraal, lang man aangestap…ek help jou graag met alles. Nadat al die aankope veilig in die motor is en ek hom bedank, sê hy: “BAIE DANKIE DAT JY MY VANDAG NODIG GEHAD HET. MY VOORREG.”
Nou nog herkou ek aan sy impak woorde!!
Net daar het ek rondgery en gekyk wie se harte kan ek blymaak met my basaaraankope.
Nou kan ek ook God se goedheid beleef: “DANKIE DAT JY MY VANDAG NODIG GEHAD HET.”
Stuur my DANKIE asb aan julle leraar en beplanningskomitee aan!!
Jou vriendin, wie so tuis voel tussen julle.
Ons is so dankbaar dat ons gemeente weer die geleentheid gehad het om vanjaar basaar in die vorm van ‘n basaarmark te kon hou. Alhoewel COVID protokol ons verhoed het om soos voorheen gesellig saam te kuier, was dit ‘n heerlike spanpoging waar so baie mense hard gewerk het om van die basaar ‘n sukses te maak, met ‘n klomp produkte, items en eetgoed om van te kus en te keur.
Teen die verhoog was verkooppunte van: Snoek & patat, Pannekoek, Spitbraai, Boeppensbroodjies (“jaffles”) en Boereworsrolle. Almal uitverkoop teen 13:00!
In Patmos was Johan en Christine besig met hul Hamburgers en chips,
en die ou voorportaal het gedien as ‘n heerlike Teekamer/kuier lokaal.
Die ander ou bekendes soos basaarpoeding, fudge, gemmerbier en koek was beskikbaar op die tafels in die saal.
Sop-en-Poeding, 4 Junie 2021
As gevolg van die inperkingsmaatreëls kon die jaarlikse Sop-en-Poeding saamkuier nie vanjaar plaasvind nie.
In die plek daarvan is besluit om dit te omskep in ‘n Kry-en-Ry geleentheid, gebaseer op vooraf bestellings.
Die gemeente het pragtig saamgewerk, en die totale bestelling was vir 402 liter sop, 113 gebakte poedings en 53 basaar poedings.
In Kosmos was Cecile en haar span besig om die bestellings vir die sop uit te sorteer.
Theresa en haar span besig in die kombuis om die warm poedings uit te skep.
Die 110 bestellings, gereed om uitgedeel te word.
Binne-in die saal was Hester en haar Caritas span besig om Paasfeespakkies op te maak vir 22 gesinne in die gemeente.
Buite in Kosmos was die twee Cecile’s en die span van Dienende Hande besig om klein koekies te verpak ter voorbereiding vir die Minimark.