Waar het u opgegroei en skoolgegaan? Piketberg. My Pa was predikant daar van 1961 to 1992. Ek het ‘n broer (‘n bouer in Stellenbosch) en twee susters (in die Noord Kaap en in die noorde van Namibië). Na matriek in 1978 het twee jaar nasionale diensplig gevolg, voordat my teologiese opeiding by die Universiteit van Stellenbosch plaasgevind het.

Hoe het u by teologie uitgekom? Ek het begeerte gehad maar wou graag  seker maak dat ek dit nie doen omdat my pa predikant was nie. Daarom het ek eers vir diensplig aangemeld. Gedurende my tweede jaar daar het die Here vir my  die sekerheid gegee dat Hy my wel daarvoor roep.

U het in ‘n pastorie grootgeword. Maak dit makliker om kinders in die pastorie groot te maak? Nie regtig nie. Ek verstaan nou beter hoekom ek dikwels ‘n afwesige pa gehad het, maar uit die aard van die saak kan ek dit nie regmaak nie. Dis maar noodwendig so dat mens dikwels uithuisig is.

Waar was u eerste gemeente? Vanaf Augustus 1988 het ek die Cradock-Noord gemeente bedien, en later daarmee saam Hofmeyr sowel as die VGK in Hofmeyr.

Dit was vir ons as advieskomitee op die ou ent baie duidelik dat u wel die persoon is wat die Here vir ons aanwys. Hoe het dit aan u kant verloop? My vrou het aanvanklik die advertensie gesien en ek het aansoek gedoen. Toe ek die beroep kry het ek dadelik gevoel dat die Here my roep so ek het eintlik gekyk vir tekens dat ek nie moet gaan nie. Daar was nie – inteendeel alles het in plek geval en ons het groot vrede gekry daaroor; selfs van die gemeentelede het bevestig dat, alhoewel hulle hartseer is dat ons moet gaan, hulle ook besef dat dit moet gebeur.

Wat is u visie, missie? My passie is dat die kerk nie vir homself moet bestaan nie. My missie is om die gemeente so te help opbou dat ons ons rol in die wêreld sal vervul – dat ons met steeds groter momentum Christus sal uitleef.